Félagsmiðstöðva- og ungmennahúsadagurinn 2016
Félagsmiðstöðva- og ungmennahúsadagurinn 2016
Fjölbreytt dagskrá verður í rúmlega 118 félagsmiðstöðvum og ungmennahúsum víða um land sem unglingarnir hafa skipulagt.
Félagsmiðstöðva- og ungmennahúsadagurinn verður haldinn hátíðlegur 2. nóvember og verða félagsmiðstöðvar og ungmennahús um allt land opnar fyrir gesti og gangandi. Það eru Samfés, samtök félagsmiðstöðva og ungmennahúsa á Íslandi, sem standa fyrir þessum degi en markmiðið er að gefa áhugasömum færi á að heimsækja félagsmiðstöðina og ungmennahúsið í sínu nágrenni, kynnast því sem þar fer fram, unglingunum og þeim viðfangsefnum sem þeir fást við með stuðningi starfsfólks.
Yfirskrift dagsins er „Framtíðin er núna“ og hvetur ungt fólk alla til að kíkja í heimsókn og kynna sér fjölbreytt, faglegt og skemmtilegt starf í félagsmiðstöðinni og ungmennahúsinu í sínu hverfi. Dagskráin er breytileg á milli staða en á það sameiginlegt að þar fær unglingamenningin að njóta sín. Víða verður boðið upp á skemmtiatriði, kaffi, kakó, vöfflur og annað meðlæti en sums staðar er veitingasala fjáröflun unglinganna vegna ferðalaga eða annarra verkefna. Allir eru velkomnir, sérstaklega foreldrar og „gamlir“ unglingar sem vilja rifja upp kynnin við gömlu félagsmiðstöðina og ungmennahúsið. Opnunartími félagsmiðstöðva og ungmennahúsa þennan dag er misjafn og gestum er bent á að líta við á heimasíðu og Facebook síðu sinnar félagsmiðstöðvar og ungmennahúss.
Láttu sjá þig :)
